Píslardauða Krists minnst víða um heim

Píslardauða Krists er minnst víða um heim í dag, föstudaginn langa. Í Jerúsalem komu hundruð manna saman í morgun og gengu um götur borgarinnar eftir Via Dolorosa til grafarkirkjunnar. Kirkjan er byggð á staðnum þar sem menn álíta að Golgata hæð hafi verið, þar sem Jesús var krossfestur og grafinn. Sumir báru krossa eftir leiðinni.

Inni í kirkjunni lutu pílagrímar og kysstu staðinn þar sem hefðin mælir fyrir um að grafhvelfing Krists hafi verið. Á Filippseyjum minntust kaþólskir menn píslardauða Krists einnig á hefðbundinn hátt. Grímuklæddir menn börðu sér á bak og gengu um götur bæjarins Pampanga. Í Pampanga er hefð fyrir miklum trúarákafa sem lýsir sér á þennan hátt. Sjö menn að minnsta kosti létu krossfesta sig í þorpinu Cutud, norður af Manila. einn þeirra var að láta krossfesta sig á þennan hátt í tuttugasta sinn. Trúarleiðtogar á Filippseyjum mæla gegn slíkum blóðsúthellingum á föstudeginum langa - en aðfarirnar hafa mikið aðdráttarafl fyrir ferðamenn sem koma víða að til að fylgjast með.