Bíllinn hans Brjesneffs á uppboði

Nú stendur fyrir dyrum í Moskvu, höfuðborg Rússlands, uppboð á bílum af ýmsum stærðum og gerðum. Það væri svosem ekki í frásögur færandi nema að bifreiðarnar voru eitt sinn í eigu fyrrverandi ráðamanna landsins.

Það kennir ýmissa grasa í sýningarsalnum í Moskvu þar sem þessar bifreiðar verða boðnar upp. Innlendar tegundir á borð við Volgu má finna í bílasafninu en þær sem vekja mesta athygli eru hins vegar glæsikerrur sem framleiddar voru á Vesturlöndum fyrir leiðtoga Sovétríkjanna þegar veldi þeirra stóð sem hæst. Eflaust renna margir hýru auga til Nissan-bifreiðar Leoníds Brjesneffs, aðalritara sovéska kommúnistaflokksins á árunum 1964-1982. Enn þann dag í dag eimir eftir af löngu liðnum tímum í henni í bókstaflegri merkingu.

Íslandvinurinn Mikhaíl Gorbatsjoff lét sér hins vegar nægja innlenda framleiðslu en hann ók jafnan um á sovéskum eðalvögnum af ZIL-gerð. Boris Jeltsín, eftirmaður Gorbatsjoffs, hafði sömuleiðis mætur á ZIL-bílunum. Ekki er þó vitað með vissu hvort hann hafi nokkurn tímann sjálfur setið á bak við stýrið enda fóru ýmis áhugamál hans illa saman við stjórn ökutækja.