Berlusconi segir kosningasvik hafa átt sér stað

Silvio Berlusconi, forsætisráðherra Ítalíu og leiðtogi bandalags hægriflokka, segir víðtæk kosningasvik hafa átt sér stað í þingkosningunum á sunnudag og mánudag. Romano Prodi, leiðtogi bandalags mið og vinstri flokka, segir tímabært að Berlusconi víki.

Berlusconi var mikið niðri fyrir í kvöld þegar hann sagði svik hafa verið í tafli í kosningunum. Þar með væri það ekki rétt að ólívubandalag Prodis hefði unnið nauman sigur í erfi og neðri deild þings líkt og opinberar tölur sýni. Forsætisráðherra var spurður hvort réttast væri að breyta úrslitunum og þá sagði hann að það yrði að gera.

Prodi var fljótur að svara forsætisráðherranum og sagði kominn tíma til að hann viki úr embætti. Bandalag mið- og vinstri flokka hefði sigrað með heiðarlegum hætti.

Margar spurningar hafa þó eflaust vaknað þegar fregnir bárust af því að fimm kassar fullir af kjörseðlum og öðrum kjörgögnum hefðu fundist í ruslatunnu í Róm í dag. Kassarnir voru allir merktir innanríkisráðuneyti landsins. Í þeim var einnig að finna önnur kjörgögn. Kassarnir fundust við grunnskóla sem er nálægt einum kjörstað.

Prodi og Berlusconi hafa báðir átt fund með Carlo Azeglio Ciampi, forseta Ítalíu, í dag. Forsetinn hefur sagt að hann ætli að eftirláta arftaka sínum að veita stjórnarmyndunarumboð en kjörtímabili hans lýkur í næsta mánuði. Velja þarf nýjan forseta fyrir þrettánda maí og sagði Prodi í dag að nýtt þing myndi á næstu dögum byrja að semja um hver verði arftaki Ciampis.

Prodi sagði einnig í dag að viðræður um skipan nýrrar ríkistjórnar myndu hefjast á næstu dögum. Hann segist hafa til þess nauðsynlegan meirihluta á þingi og engu skipti þó Berlusconi játi sig ekki sigraðann.