Vopnaður hópur nær yfirráðum í bæjum í Chad

Hópur vopnaðra manna er sagður hafa náð yfirráðum í þremur bæjum í Afríkuríkinu Chad í dag. Hópurinn tilheyrir samtökum sem segjast berjast fyrir lýðræðislegum breytingum í landinu og eru yfirlýstur andstæðingur forseta landsins, Idriss Deby. Talsmaður samtakanna sagði í samtali við Reuters-fréttastofuna í dag að fjórir hefðu særst í átökum í bæjunum þremur og fimmtíu manns hefðu verið teknir í gíslingu. Talsmaður ríkisstjórnar Chad segir aðgerðirnar ætlaðar til að koma í veg fyrir fyrirhugaðar kosningar í landinu í næsta mánuði.