Íslendingar byggja óperuhús í Danmörku

Íslenskir auðmenn ætla að láta byggja nýtt óperuhús í Kaupmannahöfn. Þannig hljómaði aprílgabb danska dagblaðsins Berlinske Tidende. Blaðið sagði frá því að íslenski fjárfestingasjóðurinn Saga Fairytales Holding, en þó ekki Group, ætlaði að láta reisa óperhúsið gegnt Óperushúsinu í Hólminum sem nýlega var opnað.

Vitnað var í Hildi Ámolsdóttur, talsmann íslensku fjárfestanna, að nýtt óperuhús væri þarfleg fjárfesting. Eftir gríðarlegar fjárfestingar í dönsku verslunarhúsnæði væri runnin upp sú stund að Íslendingar færðu sig enn frekar upp á skaptið og fjárfestu í æðri gildum. Með byggingu óperuhússins ætluðu Íslendingar að ryðja sér rúms á sviði menningar - tónlistar og listasafna. Blaðið sagði íslensku fjárfestingarvíkingana njóta óskoraðs stuðnings danskra stjórnmálamanna og forsvarsmanna Konunglega danska leikhússins. Ekki fylgir þó sögunni hvort þorri Dana hafi keypt söguna.