Bætt hefur í sinueldinn í morgun

Slökkviliðsstjórinn í Borgarnesi býst við að slökkvistarf vegna sinueldanna á Mýrum í Borgarfirði muni standa alla helgina en bætt hefur í eldinn í morgun, eftir að hann virtist vera í rénun í nótt. Slökkviliðsmenn, bændur og lögreglumenn börðust við eldinn langt fram á nótt, en þegar vind lægði, tóku slökkviliðsmenn sér langþráða hvíld. Bændur beittu meðal annars haugsugum til að sprauta vatni og verja þannig útihús og íbúðarhús sín, en tæpt stóð að eldurinn næði í sjötíu kúa fjós að Laxárholti og íbúðarhúsið í Skíðsholti. Til þess að hefta útbreiðslu eldsins enn frekar var miklu vatni sprautað á svonefndan Sauraveg í von um að eldurinn kæmist þar ekki yfir, en í morgun gerði hann það á tveimur stöðum þannig að aðstæður eru breyttar til hins verra, að sögn Bjarna Þorstienssonar slökkviliðsstjóra.

Eldurinn hefur nú þegar farið yfir marga tugi hektara lands á mörgum jörðum og vísast skemmt mikið af smárunnum lyngs og fjalldrapa, en ekki er vitað til að trjágróður hafi skemmst. Þá loga glæður víða í mosa og hætt er við öskufoki, ef enn bætir í vindinn. Mikið af gróðurhúsaefnum hefur losast út í andrúmsloftilð við brunann og er mökkurinn svo mikill að hann sést úr úr gerfitunglum NASA- bandarísku geimferðastofnunarinnar.