Kadima spáð flestum sætum á ísraelska þinginu

Útgönguspár benda til þess að Kadima-flokkur Ehuds Olmerts, starfandi forsætisráðherra, hafi fengið flest þingsæti í kosningum sem fóru fram í Ísrael í dag. Flokkurinn mun því verða góðri stöðu þegar kemur að því að mynda nýja ríkisstjórn.

Fyrir kosningarnar í dag var val kjósenda afar skýrt. Kadima-flokkurinn og Verkamannaflokkurinn vilja rýma minni landnemabyggðir en forsvarsmenn Likud-bandalagsins segja það ekki koma til greina. Síðustu kannanir bentu til þess að Kadima fengi flest þingsæti, þá Verkamannaflokkurinn og því næst Likud-bandalagið.

Sú virðist ætla að verða raunin ef marka má útgönguspár sem voru birtar eftir klukkan átta í kvöld að íslenskum tíma þegar kjörstöðum í Ísrael var lokað. Samkvæmt þeim fær Kadima-flokkurinn á bilinu 29 til 32 þingsæti, Verkamannaflokkurinn 20 til 22 sæti og Likud-bandalagið 12 sæti. Samkvæmt tveimur spám fær flokkur yst til hægri ísraelskum stjórnmálum 14 sæti, tveimur fleiri en Likud.

120 þingmenn eru á ísraelska þinginu og af þessu má ráða að hinn nýi Kadima-flokkur Sharons, forsætisráðherra, verði í oddaaðstöðu þegar kemur að því að mynda nýja ríkisstjórn. Talið er víst að Olmert fái stuðning Verkamannafloksins og flokkarnir myndi samsteypustjórn með einhverjum af smáflokkunum á þingi en allt í allt bauð 31 flokkur fram í kosningunum.

Svo virðist sem kjörsókn hafi verið fremur dræm og var talið að allt að 40% þeirra fimm milljóna manna sem eru á kjörskrá hafi ákveðið að mæta ekki á kjörstað.

Búist er við að búið verða að telja vel flest atkvæði í fyrramálið og endanlegar tölur liggi fyrir fljótlega upp úr því.