Stórsýning byggingariðnaðar í sýningarhöll

Helstu nýjungar í byggingariðnaði og mannvirkjagerð og kynning á skipulagsmálum sveitarfélaga er meðal þess sem sjá má á sýningunni Verk og vit 2006 sem opnuð var í nýju sýningarhöllinni í dag. Sýningin er sú stærsta sinnar tegundar sem haldin hefur verið hér á landi.

Það var Valgerður Sverrisdóttir iðnaðarráðherra sem opnaði sýninguna í dag að viðstöddum helstu forkólfum iðnaðar í landinu. Alls taka um 120 sýnendur þátt í sýningunni sem spannar allt frá skipulagsmálum sveitarfélaga til stakra lausna á heimilum. Fjögur ár eru síðan Samtök iðnaðarins héldu svipaða sýningu hinum megin þilja í Laugardalshöllinni en frá þeim tíma hefur verið mikill uppgangur í mannvirkjagerð og hefur verkefnastaða fyrirtækja í byggingariðnaði sjaldan verið jafn góð að sögn kunnugra. Velta í byggingarstarfsemi og mannvirkjagerð jókst mikið á milli áranna 2004 og 2005 og bendir margt til að heildarveltan verði ríflega 150 milljarðar á síðasta ári að sögn aðstandenda sýningarinnar.

En það voru ekki einungis fyrirtæki og sveitarfélög sem sýna sig og sjá aðra í sýningarhöllinni því Iðnskólinn í Reykjavík, þar sem margir af iðnaðarmönnum landsins hafa sótt menntun sýna. Þar eiga nemendur heiðurinn af sýningarbásnum.

Sýningin er opin almenningi frá klukkan tólf til fimm um helgina.