Ólga á herteknu svæðunum eftir árás Ísraela

Ófremdarástand hefur ríkt á Gaza-ströndinni og Vesturbakkanum í dag eftir að Ísraelsher réðst á fangelsi í Jeríkó þar sem grunaðir hermdarverkamenn voru í haldi. Kveikt var í húsakynnum bandarískra og breskra stofnana og nokkrum Vesturlandabúum var rænt.

Kveikjan að ólgunni var árás ísraelska hersins á fangelsi í hinni fornu borg Jeríkó á Vesturbakkanum í morgun þar sem meðal annarra voru vistaðir sex Palestínumenn sem Ísraelar telja að hafi ráðið ferðamálaráðherra landsins af dögum árið 2001. Í þeim hópi er Ahmed Saadat, leiðtogi samtakanna Lýðfylking fyrir frelsun Palestínu. Palestínsk stjórnvöld höfðu lýst því yfir að ekkert benti til að hann hefði staðið fyrir tilræðinu og því bæri að sleppa honum. Umsátrið stóð yfir í allan dag en undir kvöld gáfust sexmenningarnir upp fyrir sveitum Ísraela Þegar umsátrið spurðist út greip um sig mikil reiði á herteknu svæðunum í garð Vesturlanda því skömmu fyrir árásina yfirgáfu breskir og bandarískir eftirlitsmenn fangelsið en þeir töldu sig ekki geta lengur gætt öryggis fanganna.

Mahmoud Abbas forseti heimastjórnarinnar fordæmdi brotthvarf eftirlitsmannanna og leiðtogar Hamas vöruðu Ísraela við að skaða fangana. Á Gaza-ströndinni var kveikt í bresku menningarstofnuninni og skemmdir voru unnar á húsnæði fjölmargra erlendra samtaka. Æstur múgur réðist inn á hótel í leit að Vesturlandabúum og var í það minnsta níu útlendingum rænt á Gaza, tveimur þeirra var þó sleppt skömmu síðar. Í bænum Jenín á Vesturbakkanum var farið í kröfugöngu og er óhætt að segja að göngumönnum hafi verið heitt í hamsi. Árásin á fangelsið er umfangsmesta hernaðaraðgerð Ísraelshers í marga mánuði.

Tvær vikur eru til ísraelsku þingkosninganna og því er tæpast tilviljun að stjórnvöld ráðast til atlögu nú.