Guð dæmi hvort rétt hafi verið að ráðast inn í Írak

Ummæli Tonys Blair, forsætisráðherra Bretlands, um að "Guð myndi dæma um hvort rétt hafi verið að ráðast inn í Írak" hafa vakið athygli og furðu. Blair lét þessi orð falla í viðtali sem sjónvarpað verður í kvöld þar sem hann viðurkenndi einnig að áhugi hans á stjórnmálum hefði kviknað vegna trúarsannfæringar sinnar. Sú saga hefur lengi verið á kreiki að Blair og George Bush Bandaríkjaforseti hefðu sameinast í bæn á fundi í Texas árið 2002 þar sem talið er að ákvörðunin um innrásina í Írak hafi verið tekin. Þetta hefur Blair hins vegar aldrei viðurkennt enda líta Bretar það hornauga að blanda trúarbrögðum saman við stjórnmál.