Nöfn Guantanamo-fanga loksins birt

Bandaríska varnarmálaráðuneytið hefur í fyrsta sinn birt nöfn og þjóðerni þorra fanganna sem eru í haldi í Guantanamo-búðunum á Kúbu. Vonast er til að þar með geti farið fram sjálfstætt mat hvort þeir séu eins hættulegir og Bandaríkjastjórn heldur fram.

Talið er að á sjötta hundrað fanga séu í haldi í hinni illræmdu herstöð Bandaríkjamanna við Guantanamo-flóa. Hingað til hefur hins vegar lítið verið vitað um hverjir dúsa þar því að eingöngu hefur verið hægt að byggja á frásögnum fanga sem sleppt hefur verið. Nú hefur bandarískur alríkisdómstóll hins vegar komist að þeirri niðurstöðu að á grundvelli upplýsingalaga beri landvarnaráðuneytinu að afhenda AP-fréttastofunni gögnin. Ekki þótti ástæða til að taka mark á mótbárum Pentagon um að birting þeirra væri skerðing á friðhelgi einkalífs fanganna enda telja gagnrýnendur búðanna að þeir sæti þar mun grófari mannréttindabrotum. Þau gögn sem nú hafa verið birt eru leynilegar greinargerðir sérstakra herdómstóla þar sem lagt er mat á hvort um fimm hundruð manns geti talist til þess sem bandarísk stjórnvöld kalla "óvinveitta vígamenn". Nöfn þeirra og þjóðerni eru hins vegar ekki í samfelldum lista heldur er þau að finna á víð og dreif um sex þúsund síðna löng málsskjölin þannig að dágóður tími mun fara í yfirferð þeirra. Mannréttindasamtök fagna úrskurðinum mjög og segja talsmenn þeirra hann höggva verulegt skarð í þann leyndarhjúp sem bandaríska ríkisstjórnin hefur sveipað svonefnt stríð sitt gegn hryðjuverkum. Þeir benda á að nú verði í fyrsta sinn hægt að meta á sjálfstæðan hátt hversu hættulegir fangarnir í Guantanamo raunverulega eru. Líklegt er þó talið að í búðunum séu fangar sem dómstólarnir fjölluðu ekki um og því er tæpast nokkuð um þá að finna í þessum gögnum.