Blóðbaðið heldur áfram í Írak - umferð einkabíla bönnuð í Bagdad

Blóðbaðið í Írak ætlar engan endi að taka. Stjórnvöld hafa gripið til þess ráðs að banna umferð einkabíla í höfuðborginni Bagdad.

Átökin milli sjía og súnnía virðast síst vera í rénun. Fimmtíu vopnaðir árásarmenn úr röðum súnnía myrtu minnst tuttugu og fimm sjía í Bagdad seint í gærkvöldi. Sjíarnir, sem voru við vinnu, vissu ekki hvaðan á sig stóð veðrið, þegar árásarmennirnir birtust skyndilega og hófu skothríð með fyrrgreindum afleiðingum.

Eins og síðasta föstudag verður öll umferð einkabíla bönnuð í Baghdad í dag. Lögregla vaktar allar umferðaræðar inn í borgina og hefur fyrirmæli um að stöðva allar bifreiðar sem ekki eru í sérstökum erindagjörðum. Þetta er gert til að koma í veg fyrir bílsprengjuárásir.

Í dag er föstudagsbænin mikilvæga og stjórnmálamenn hvetja trúarleiðtoga eindregið til að magna ekki upp reiðina í fólki í bæninni. Einn hópur þráir þó ekkert heitar en að ofeldið færist enn í vöxt og borgarastyrjöld brjótist út.

Hryðjuverkasamtökin al-Qaida hyggjast fremja stóra hryðjuverkaárás í Írak á næstunni. Þetta hefur fréttastofa CBS eftir bandarískum embættismönnum í landinu. Ekki liggi fyrir hvort ætlunin sé að fremja eina stóra árás, eða margar árásir á sama tíma, en tilgangurinn sé að ýta landinu endanlega út í borgarastyrjöld.