Slitnaði upp úr fundi ESB-velda og Írans

Flest bendir til að öryggisráð Sameinuðu þjóðanna samþykki í næstu viku að gripið verði til aðgerða gegn Íran. Í morgun slitnaði upp úr fundi milli Írana og stórvelda Evrópu, þar sem reyna átti að ná sáttum.

Nú er mánuður liðinn síðan samþykkt var að senda kjarnorkuþróun Írans fyrir öryggisráð Sameinuðu þjóðanna. Í samþykktinni fólst að Íranar fengju þennan mánuð til að gera hreint fyrir sínum dyrum og sýna samstarfsvijla. Að öðrum kosti yrði íhugað að beita þá efnahagsþvingunum, nú eða jafnvel hervaldi, þó að almenn sátt virðist ríkja um að ekki verði gripið til þess nema að öllum öðrum leiðum fullreyndum.

Á fundinum í morgun var gerð úrslitatilraun til að ná sáttum fyrir fund Alþjóðakjarnorkumálastofnunarinnar á mánudaginn. Fundinn sátu auk fulltrúa Íransstjórnar, fulltrúar Frakka, Þjóðverja og Breta. Fundurinn skilaði engu og að honum loknum sagði Frank Walter Steinmeyer, utanríkisráðherra Þýskalands, að Íranar hefðu ekkert nýtt haft fram að færa á fundinum.

Flest bendir því til að stórveldin sem eiga fast sæti í öryggisráðinu muni byrja að hnykkla vöðvana gagnvart Íran á næstu vikum. Á fundi Alþjóðakjarnorkumálastofnunarinnar á mánudaginn verður tekin ákvörðun um næstu skref.

Hinn opinskái forseti Írans, Mahmoud Ahmedinajad, lætur hins vegar allar hótanir sem vind um eyru þjóta og segir að ofríki vestrænna stórvelda muni ekki endast öllu lengur. Þau eigi eftir að finna fyrir þeirri öflugu óánægjubylgju sem sé að myndast í MiðAusturlöndum. Þegar hún skelli á af fullu afli muni vesturveldin og Síonistarnir ekki vita hvaðan á þau stendur veðrið.