Fyrrverandi hjúkrunarfræðingur í ellefufalt lífstíðarfangelsi

Dómstóll í Bandaríkjunum dæmdi í gær fyrrverandi hjúkrunarfræðinginn Charles Cullen í ellefufalt lífstíðarfangelsi fyrir að hafa myrt tuttugu og tvo sjúklinga og reynt að drepa þrjá til viðbótar.

Cullen, sem nefndur hefur verið sonur Satans í bandarískum fjölmiðlum, hefur viðurkennt að hann hafi drepið allt að 40 manns frá því að hann hóf störf sem hjúkrunarfræðingur árið 1987 en enn á eftir að rétta yfir honum vegna hluta morðanna. Cullen drap fólkið með því að gefa því of stóra skammta af lyfjum en það komst ekki upp um hann fyrr en síðla árs 2003 þar sem mörg fórnarlamba hans voru eldri borgarar og dánarorsök margra þeirra var ekki talin óeðlileg. Cullen sleppur við dauðadóm þar sem hann hefur verið samvinnuþýður við rannsókn málanna.