Bush virðist hafa logið

Bush Bandaríkjaforseti virðist hafa sagt ósatt um að ekki hefði verið hægt að sjá fyrir skelfilegar afleiðingar fellibylsins Katrínar og að hann kynni að brjóta niður flóðvarnir New Orleans borgar. AP-fréttastofan hefur komist yfir myndbandsupptöku frá 28. ágúst þar sem embættismenn vara Bush við því að New Orleans borg kunni að fara á kaf eftir að fellibylurinn hafi gengið yfir.

Þann 28. ágúst í fyrra, degi áður en fellibylurinn Katrín skall á, sat Bush Bandaríkjaforseti símafund með yfirmanni fellibyljamistöðvar Bandaríkjanna og Michael Brown, þáverandi yfirmanni almannavarna þar í landi.

Þar sagði Max Mayfield, yfirmaður fellibyljastöðvar Bandaríkjanna að ekki væri hægt að segja með vissu að flóðvarnirnar myndu bresta en rétt væri að hafa áhyggjur af því.

Á fundinum fullvissaði Bandaríkjaforseti alla sem þar voru um að yfirvöld væru undirbúin undir það sem væri að fara að skella á. Þann 1. september sagði svo Bandaríkjaforseti að hann teldi að enginn hefði geta séð fyrir að flóðvarnirnar myndu bresta. Þessi ummæli forsetans ganga þvert á það sem fram kemur á upptökum frá símafundinum.

AP fréttastofan náði í gær tali af Michael Brown og spurði hann beint út í málið. Þar sagði Brown þetta ekki rétt hjá forsetanum. Allir hafi vitað af þessari hættu og Max Mayfield hefði gert skýra grein fyrir henni á símafundinum.

Borgarstjórinn í New Orleans, Ray Nagin, hefur gagnrýnt stjórnvöld og sagt viðbrögð vegna hamfaranna ekki sem skildi. Nú komi í ljós að yfirvöld hafi gert sér grein fyrir hættunni. Því komi það honum á óvart að yfirvöld hafi brugðist hægt við hörmungunum.