Vissi af hættunni

George Bush Bandaríkjaforseti vissi að fellibylurinn Katrín kynni að brjóta niður flóðvarnir New Orleans degi áður en fellibylurinn skall á borgina. Eftir að neyðaraðstoð hafði gjörsamlega brugðist sagði forsetinn hins vegar að enginn hefði getað séð fyrir hve miklar afleiðingarnar yrðu.

Í myndbandsupptöku frá tuttugasta og áttunda ágúst, sem AP fréttastofan hefur komist yfir sést hvar embættismenn vara Bush við því að New Orleans kunni að fara á kaf eftir yfirreið fellibylsins Katrínar. Bush hlustar á viðvaranirnar og fullvissar alla um að stjórnvöld séu tilbúin. Þar segist hann vilja þakka hinum góðu embættismönnum Lousiana, Alabama og Mississippi, fyrir að hlusta á viðvaranirnar og undirbúa íbúana undir þennan mikla fellibyl. Hann fullvissi embættismenn þessara ríkja um að stjórnvöld séu reiðubúin til að hjálpa þegar fellibylurinn gangi yfir og til þess verði notuð öll þau meðul sem þau hafi yfir að ráða.

 

Þessi orð ganga þvert gegn því sem Bush hélt fram eftir að hjálparstarfið klúðraðist svo illa að yfirmaður almannavarna Michael Brown, neyddist til að segja af sér. Enginn hefði mögulega getað séð fyrir að fellibylurinn yrði svo öflugur að flóðvarnir myndu bresta.

Borgarstjórinn í New Orleans Ray Nagin, trúði vart sínum eigin augum, þegar upptakan var spiluð fyrir hann í gær. Hann þyrfti að fara betur yfir málið, en flest benti nú til að allir hefðu verið meðvitaðir um hættuna sem vofði yfir og því ótrúlegt hve illa hjálparstarfið hafi gengið.