Tímamótasamkomulag um kjarnorkuþróun

Bush og Manmohan Singh, forsætisráðherra Indlands, funduðu í morgun og tilkynntu um samkomulagið að fundinum loknum. Í því felst að Bandaríkjamenn veita Indverjum upplýsingar um tækni til að þróa kjarnorku til orkunota. Með þessu móti segjast Bandaríkjamenn vilja hjálpa til við að ýta undir öran efnahagsvöxt Indlands. Á móti skuldbinda Indverjar sig til að undirgangast strangt eftirlit, enda er þeim einungis heimilt að notfæra sér upplýsingarnar í friðsamlegum tilgangi.

Indverjar eru ekki aðilar að samkomulagi sem bannar útbreiðslu kjarnavopna og það breytist ekki þrátt fyrir samkomulagið í morgun.

Samningurinn tekur ekki gildi fyrr en Bandaríkjaþing samþykkir hann. Það verður að teljast afar líklegt, jafnvel þó að hópur þingmanna hafi gagnrýnt samkomulagið og segi það grafa undan kjarnorkusamkomulaginu.

En heimsókn Bush hefur ekki gengið þegjandi og hljóðalaust fyrir sig. Í Nýju Dehli söfnuðust tíu þúsund manns saman og gengu fylktu liði tvo kílómetra, og mótmæltu komu Bush. Þá hafa stórir hópar fólks líka safnast saman í Kashmir í sama tilgangi.

Þá er órói líka byrjaður að gera vart við sig í Pakistan, í aðdraganda heimsóknar Bush forseta um helgina. Fjórir létust og tugir manna slösuðust í sprengjuárás fyrir utan bandarísku ræðismanns skirfstofuna í Karachi í morgun. Tvær sprengjur sprungu með skömmu millibili á bílastæði Marriot lúxushótelsins, sem er við hliðina á ræðismannsskrifstofunni. Gluggar á skrifstofunni splundruðust og hótelið skemmdist einnig töluvert.