Þrjátíu þúsund mótmæltu gyðingahatri

Meira en þrjátíu þúsund manns gengu fylktu liði um götur Parísar í gær, til að mótmæla morði á gyðingi, sem kynþáttahatarar pyntuðu í þrjár vikur.

Lík mannsins fannst illa brennt og handjárnað um miðjan febrúar, þrem vikum eftir að glæpagengi rændi honum í suðurhluta Parísar. Málið hefur vakið mikinn óhug í borginni þar sem gyðingahatur hefur skotið rótum hjá stórum hópi ungmenna. Innanríkis- og utanríkisráðherrar Frakka leiddu mótmælagönguna í gær og báðir sögðust þeir ætla að gera allt sem í þeirra valdi stæði til að taka hart á minnstu vísbendingum um kynþáttahatur í landi þar sem allir hefðu sama rétt, óháð trú eða hörundslit.