Rannsókn miðar vel

Breska lögreglan upplýsti í morgun að hún hefði fundið byssur, hlífðarbúnað og grímur í sendiferðabíl sem fannst fyrir utan hótel í fyrradag.

Talið er að búnaðurinn tengist einu stærsta ráni í sögu Bretlands sem framið var í fjárhirslu á miðvikudag. Ræningjarnir munu hafa komist undan með jafnvirði allt að sex milljarða íslenskra króna.

Lögregla segir rannsókn málsins ganga vel. Tveir menn á fertugs og sextugsaldri eru í haldi lögreglu vegna málsins. Einn maður og tvær konur hafa verið látin laus gegn tryggingu en þau voru færð til yfirheyrslu fyrir helgi.