Abbas gæti hætt ef Hamas-liðar breyta ekki stefnu sinni

Líkur eru á að Mahmoud Abbas, forseti Palestínumanna, segi af sér takist honum ekki fá Hamas-samtökin, sigurvegara þingkosninganna í síðasta mánuði, til að fara að kröfum alþjóðsamfélagsins. Abbas fer þess á leit við ríki heims að snúa ekki baki við Palestínumönnum í refsingarskyni fyrir lýðræðislegt val þeirra.

Abbas var gestur í fréttaþætti á bresku sjónvarpsstöðinni ITV í gær. Þar gaf forsetinn það sterklega í skyn að hann myndi láta af embætti ef honum tækist ekki að fá Hamas-liða til að fara að kröfum vesturveldanna. Hann hvatti einnig ríki heims til að sýna þolinmæði og gefa liðsmönnum Hamas færi á að átta sig á þeirri stöðu sem þeir væru í nú sem ráðandi afl í palestínsku heimastjórninni. Það bæri engan árangur að króa þá af með miklu offorsi.

Abbas sagði Ismail Haniyeh, forsætisráðherraefni Hamas, vísan og rökréttan mann. Hann hvatti vestræn ríki og samtök til að láta af því að refsa Palestínumönnum fyrir lýðræðislegt val þeirra með því að skerða fjárstuðning til heimastjórnarinnar.

Abbas var spurður hvort hann vonaði að Íranar gætu hlaupið í skarðið og haldið heimastjórninni á floti ef nánast allur fjárstuðningur frá vestrænum ríkjum yrði skertur. Forsetinn svaraði því til að honum þætti verra ef heimastjórnin neyddist til að velja lið ef svo mætti segja. Hann bætti því við að stuðningur frá Íran myndi einn og sér ekki duga til að tryggja starfsemi heimastjórnarinnar.