Mannskæð átök í Írak

Að minnsta kosti sjö létu lífið og tugir særðust þegar bílsprengja sprakk á fjölförnum markaði í borginni Kerbala í Suður-Írak í morgun. Svo virðist sem sprengjan hafi verið fjarstýrð. Árásin var gerð aðeins nokkrum klukkustundum eftir að byssumenn réðust inn í hús í borginni Baquba í Norður-Bagdad og myrtu tólfmanna fjölskyldu sjía múslima.

Útgöngubann er enn í gildi í höfuðborginni Bagdad og voru fáir á ferli þar í morgun. Óttast er að borgarastyrjöld kunni að brjótast út í landinu en átök milli sjía og súnní-múslima hafa færst í aukana síðan ein helgasta moska sjía-múslima var sprengd í loft upp á miðvikudag. Ibrahim al-Jaafari, forsætisráðherra Íraks hét því í gær að þær moskur sjía og súnnía, sem hefðu eyðilagst í átökunum, yrðu reistar á ný.

Vel þekkt fréttakona frá arabísku sjónvarpsstöðinni Al-Arabía var borin til grafar í Írak morgun en hún lét lífið í átökum á miðvikudag þegar hún var að vinna að frétt um árásina á moskuna í Samarra. Um það bil 150 manns fylgdu henni til grafar.

Skotið var á líkfylgdina þar sem hún fór um vesturhluta Bagdad og svöruðu öryggissveitir í sömu mynt en um það bil 60 hermenn höfðu fengið það verkefni að gæta syrgjenda. Einn hermaður lét lífið í skotbardaganum og einn almennur borgari særðist. Þegar líkfylgdin nálgaðist svo þann stað þar sem konan skyldi lögð til hinstu hvílu ók ein bifreið öryggissveitarmanna yfir sprengju sem varð tveimur hermönnum að bana og særði fjóra almenna borgara.