Fuglaflensan breiðist hratt út

Fjölmörg ný fuglaflensutilfelli, af hinum banvæna H5N1-stofni, voru staðfest víða í Evrópu í dag. Nú er óttast að alifuglar í Þýskalandi og Frakklandi hafi drepist af völdum veirunnnar.

Í Þýkalandi hafa nú á annað hundrað fuglaflensutilfelli verið staðfest í villtum fuglum og er nú óttast að H5N1 stofninn hafi stungið sér niður í alifuglum í landinum. Sömu sögu er að segja frá Frakklandi. Fuglaflensa greindist þar í villtum fuglum í síðustu viku og staðfest var í dag að hún hefði greinst í fuglum á kalkúnabúi. Níutíu prósent kalkúnanna drápust að sögn dýralæknis, en þó vilja yfirvöld enn ekki staðfesta hvort um er að ræða banvæna stofn flesunnar H5N1, en í nágrenni kalkúnabúsins eru tjarnir sem laða að villta fugla.

Alifuglaiðnaðurinn í Frakklandi er sá stærsti innan Evrópusambandsins með um 200 þúsund bú og því fjárhagslegir hagmundir í hættu. Nú þegar finna franskir kaupmenn fyrir áhrifunum.

Í dag bárust einnig fréttir af því að þrír villtir fuglar í Hong Kong hefðu greinst með banvæna afbrigði fuglaflensunnar, fyrstu tilfellin í Slóvakíu hafa verið staðfest, sem og að veiran hafi drepið villta fugla í Georgíu og Suður Rússlandi. Þar hafa sautján þorp verið sett í einangrun og 12 þúsund fuglar verið drepnir. Bændur á svæðinu geta einungis vonað það besta.

Enn er litið á vírusinn sem fuglasjúkdóm og hann smitast ekki auðveldlega í menn. Tugir milljóna fugla víðs vegar um heimsbyggðina hafi sýkst af veirunni frá árinu 2003, þegar tilkynnt var um fyrstu tilfellin í Suðaustur Asíu. Staðfest mannslát af völdum veirunnar eru á annað hundrað.