Neyðarástand á Filipseyjum

Gloria Arroyo, forseti Filippseyja, lýsti yfir neyðarástandi í landinu í morgun eftir að fregnir bárust af því að valdamenn í hernum hafi ætlað að velta henni úr sessi í dag. Tuttugu ár eru á morgun frá því Ferdinand Marcos, þáverandi einræðisherra, flúði í útlegð eftir uppreisn almennings gegn honum.

Arroyo hefur staðið af sér tvær valdaránstilraunir áður. Hún segir herinn hafa stöðvað ráðaburgg nokkurra yfirmanna í her landsins um að ræna völdum í dag. Öfgamenn til hægri og vinstri í stjórnmálum vildu koma henni frá völdum og þeir væru skýr og greinileg ógn við lýðveldinu. Hún hefur lýst yfir neyðarástandi í landinu ekki en ekki talið þörf á að setja herlög.

Yfirvöld hafa afturkallað leyfi fyrir fjöldafundum í dag en á morgun eru tuttugu ár frá því Ferdinand Marcos, fyrrverandi einræðisherra, var hrakinn frá völdum og í útlegð. Mótmælendur ætluðu að koma saman á tiltekinni götu í höfuðborginni Manilla, sem er táknræn fyrir atburðina fyrir tveimur áratugum. Þar hafði lögregla tekið sér stöðu og meinað fólkinu að komast þar að.

Til átaka kom þegar forsvarsmenn mótmælenda reyndu að semja við lögreglu en rúmlega fimm þúsund stjórnarandstæðingar ætluðu að koma þar saman. Fjölmargir mótmælendur voru handteknir í ryskingunum, þar á meðal mikilsmetnir leiðtogar stjórnandstæðinga.