49 lík hafa fundist

Í það minnsta 49 manns krömdust til bana og þrjátíu til viðbótar slösuðust þegar þak yfir markaðstorgi í Moskvu hrundi í morgun. Snjóþyngsli eru talin líklegasta skýringin á slysinu en lögreglan útilokar ekki hönnunargalla. Vanalega er ys og þys á þessum yfirbyggða markaði í Moskvu en í dag hefur verið þar ömurlegt um að litast. Í dögun, skömmu áður en átti að opna markaðinn, hrundi þak hans yfir á annað hundrað starfsmenn, sem flestir eru frá fyrrum lýðveldum Sovétríkjanna, sem þar voru að undirbúa viðskipti dagsins. Björgunarsveitir voru þegar kallaðar á vettvang og unnu þær hörðum höndum í allan dag við að ná fólki út, lífs eða liðnu. Sumir þeirra sem festust undir brakinu náðu að hringja úr farsímum til að láta vita af sér, aðrir hrópuðu einfaldlega af öllum lífs og sálarkröftum. Að minnsta kosti 49 lík hafa fundist í rústunum og þrjátíu hafa verið fluttir til aðhlynningar á sjúkrahús. Enn eru tugir manna sagðir fastir í brakinu. Mikið hefur snjóað í Moskvu að undanförnu og er því talið að þakið hafi hreinlega gefið sig undan rúmlega hálfs metra þykku snjólagi sem hvíldi ofan á því. Lögreglan útilokar þó hvorki að eigendur hafi vanrækt að halda byggingunni við né að hönnunargalli geti verið orsök slyssins því fyrir tveimur árum hrundi þak á mannvirki sem sami arkitekt teiknaði. Þá fórust 28 manns. Í síðasta mánuði létust 66 í Katowice í Póllandi þegar þak á skautahöll lét undan snjóþunga, og í janúarbyrjun dóu 15 þegar þak annarrar slíkrar hallar í Bæjaralandi gaf sig af sömu ástæðum.