Óttast að borgarastyrjöld brjótist út

Hjaðningavíg írakskra sjía og súnnía hafa gengið á víxl undanfarinn sólarhring eftir að ein helgasta moska sjía var sprengd í loft upp í gær. Yfir hundrað og þrjátíu Írakar liggja í valnum og tugir helgidóma súnnía hafa verið eyðilagðir. Versta ódæðið var unnið við vegatálma í úthverfi Bagdad þar sem 47 verkamenn voru teknir af lífi. Í Basra réðust vígamenn, íklæddir lögreglubúningum, inn í fangelsi, tóku með sér 11 súnnía og skutu þá svo til bana. Jalal Talabani forseti skoraði á landsmenn í dag að sýna stillingu eftir að hafa látið ljós ótta sinn um að þjóðin rambaði á barmi borgarastyrjaldar.