Umdeilt að arabískt fyrirtæki reki hafnir í Bandaríkjunum

Fjölmargir bandarískir stjórnmálamenn hafa gagnrýnt þá ákvörðun stjórnar Bush Bandaríkjaforseta að heimilia arabísku fyrirtæki að taka yfir rekstur sex stórra hafna þar í landi. Fyrirtækið, sem staðsett er í Sameinuðu Arabísku furstadæmunum, hefur keypt breskt fyrirtæki sem hefur séð um rekstur hafna í sex borgum, þar á meðal Miami og New York.

Margir þingmenn og ríkisstjórar eru ósáttir við að gildandi samningum hafi ekki verið rift og hafa ríkisstjórar í tveimur ríkjum þar sem nokkrar hafnirnar er að finna hótað að gera einmitt það. Þeir segja sögu Sameinuðu Arabísku furstadæmanna dökka. Þar hafi hryðjuverkamenn haft bækistöðvar og geymt fé, þar á meðal þeir sem skipulögðu hryðjuverkaárásirnar á New York og Washington 11. september 2001.