Ákæra sjö manns fyrir stuðning við hryðjuverkasamtök

Lögreglan í Kaupmannahöfn hefur ákært sjö manns fyrir að hafa með sölu á stuttermabolum stutt við hryðjuverkastarfsemi.

Fatafyrirtækið Fighters and Lovers í Danmörku hefur að undanförnu framleitt og selt boli með merkjum palestínsku samtakanna PFLP og hinna kólumbísku FARC, en hluti söluandvirðisins rennur til samtakanna. Þau eru hins vegar á lista Evrópusambandsins yfir hryðjuverkasamtök og því hafa lögregluyfirvöld í Danmörku ákært alla þá sem selt hafa bolina. Ekki er ljóst hversu þung refsing bíður fólksins verði það sakfellt fyrir að styðja við hryðjuverkasamtök.