Hamas-liðar æfir yfir niðurskurði á fjárframlögum

Talsmenn Hamas-samtakanna eru æfir yfir ákvörðun Bandaríkjanna og Evrópusambandsins um að skera niður fjárframlög til heimastjórnar Palestínumanna. Þeir segja ráðstöfunina ekki í þágu Mið-Austurlanda.

Framkvæmdastjórn Evrópusambandsins ákvað í gærmorgun að stöðva fjárframlög til heimastjórnar Palestínumanna þangað til Hamas-samtökin viðurkenna Ísraelsríki og lýsa því afdráttarlaust yfir að friðarsamningar sem þegar hafa verið gerðri við Ísraela verði virtir. Bandarísk stjórnvöld greindu svo frá því í gærkvöld að þeirra fjárstuðningur yrði einnig stöðvaður í bili.

Palestínumenn reiða sig mjög á erlend fjárframlög og lætur enginn þeim meiri fjármuni í té en ESB og Bandaríkjastjórn eða rúma 70 milljarða króna á ári. Enda þótt einungis hluti þessara greiðslna verði frystur, eða það fé sem rennur beint til heimastjórnarinnar og starfsmanna hennar, er ljóst að þessar ráðstafanir ESB og Bandaríkjastjórnar setja efnahag sjálfstjórnarsvæðanna í verulegt uppnám.

Ismail Haniya, Hamas-liði og forsætisráðherra Palestínu, var ómyrkur í máli þegar hann ræddi við blaðamenn, hann sagði ákvörðunina óréttláta og fljótfærnislega og síst verða til að auka líkurnar á friði fyrir botni Miðjarðarhafs. Palestínskir embættismenn sögðu í samtali við BBC í morgun að líklegt væri að heimastjórnin sneri sér til annarra íslamskra ríkja eftir fjárstuðning, til dæmis Írans.