Vill grunnfjarskiptakerfi Símans aftur í eigu þjóðarinnar

Taka á grunnfjarskiptakerfi Símans og setja það aftur í eigu þjóðarinnar aðeins þannig verður þjónustan ódýr og best. Þetta segir Jón Bjarnason, þingmaður Vinstri-grænna, en GSM símakostnaður Íslendinga hefur hækkað undanfarin ár á meðan hann hefur lækkað á Norðurlöndunum.

Nýr samanburður póst- og fjarskiptastofnana á Norðurlöndunum sýnir að kostnaður við gsm símtöl hefur farið lækkandi á Norðurlöndunum frá árinu 2002, nema á Íslandi sem og að notkunin hefur aukist allsstaðar nema á Íslandi.

Jón Bjarnason, þingmaður Vinstri-grænna, segir það ekki koma á óvart að verðið rjúki upp hér á landi en á meðan að Síminn hafi verið í eigu þjóðarinnar hafi verð á símtölum verið einna lægst hér á landi samanborið við það sem gerist á Norðurlöndunum og jafnvel þó víðar væri leitað.

Jón segir að við einkavæðingu og sölu Símans hafi skapast fullkomin fákeppni ,, og jafnvel einokunarstaða á mörgum vettvöngum þjónustu hans. Afleiðingar hennar eru kunnar, lokun starfstöðva vítt og breitt um landið.” Jón segir þjónustu við viðskiptavini hafa verið skerta. Aukinn kostnað við símtöl megi rekja til þess að fyrirtækið sé nú fyrst og fremst rekið á arðsemisgrunni en ekki sem þjónstufyrirtæki. ,, Vinstri-grænir vöruðu við þessu og lögðust alfarið gegn einkavæðingu Símans, að minnsta kosti grunnfjarskiptakerfi hans,” segir Jón og jafnframt að allt sé nú að koma fram sem þeir vöruðu við, það er einokun, fákeppni og hækkað verð.

Póst- og fjarskiptastofnunin segir fákeppni einkenna íslenska markaðinn og bindur vonir við að fleiri fyrirtæki komi inn á markaðinn. Jón segir ljóst að þessi samkeppni sem um sé að ræða geti í hæsta lagi orðið á allra þéttbýlasta svæðinu á suðvesturhorni landsins.

Jón vill að grunnfjarskiptakerfi Símans verið tekið aftur og lagt undir þjóðina ,, við rekum það sem öfluga samfélagsþjónustu sem allir eiga jafnan aðgang að, þá verður þjónustan bæði ódýr og best.“ Hann segir ljóst að Vinstri-grænir komi til með að taka málefni Símans upp á Alþingi þegar þing hefst á ný.