Rangar líkamsleifar afhentar

Chilesk yfirvöld hafa beðið ættingja 126 fórnarlamba herforingjastjórnarinnar illræmdu afsökunar eftir að í ljós kom að þeim voru afhentar rangar líkamsleifar. Fjölmörg lík voru grafin upp í upphafi tíunda áratugarins og komið til ættingja en röng kennsl virðast hafa verið borin á hluta þeirra. Algengt var að tvö eða fleiri lík væru sett saman í kistu, "til að spara pláss í kirkjugörðum," eins og Augusto Pinochet, leiðtogi herforingjastjórnarinnar orðaði það, og af því stafar ruglingurinn. Sorg ættingjanna er mikil enda verður að skrá ástvini þeirra sem horfna á ný.