Eldfimt ástand á Gasa-ströndinni

Heimastjórn Palestínumanna, undir forystu Hamas-liða, hvetur herskáa Palestínumenn til að láta af árásum á liðsmenn Fatah-hreyfingar Abbas forseta. Ástandið á Gasa-ströndinni hefur verið eldfimt frá því leiðtogi herskárra Palestínumanna féll í árás Ísraela í gær.

Til átaka kom milli fylkinga Palestínumanna í gær vegna árásarinnar og féllu þrír og rúmlega þrjátíu særðust. Þegar einn hinna látnu var borinn til grafar í morgun kom til átaka. Enginn mun hafa látið lífið í þeim. Fatah-liðar eru sakaðir um að hafa átt þátt í árásinni í gær.

Ismail Haniyeh, forsætisráðherra, segir heimastjórnina fylgjast vandlega með þróun mála. Haniyeh segir hættulegt ástand að skapast í landinu og bætti því við að öryggissveitir myndu reyna að hafa hendur í hári byssumanna.

Innanríkisráðherra heimastjórnarinnar, átti í dag fund með yfirmanni öryggissveita sem tengdar eru Fatah. Sá sagði að samið hefði verið um að árásin yrði í gær yrði rannsökuð.

Þrátt fyrir að ýmis herská samtök Palestínumanna hafi samþykkt að leggja niður vopn meðan rannsókn fer fram ruddust fimmtán liðsmenn Al Aqsa hersveitanna, gráir fyrir járnum, inn í byggingu innanríkisráðuneytisins í Nablus á Vesturbakkanum í dag. Því umsátri lauk þó skömmu síðar án blóðsúthellinga.