Abbas hótar Hamas-liðum

Mahmoud Abbas, forseti Palestínumanna, ætlar ekki að reka nýskipaða heimastjórn Hamas-liða þó lög heimili honum það. Þetta sagði forsetinn í sjónvarpsviðtali í gær þar sem hann tiltók að samkvæmt stjórnarskrá hefði hann skýra heimild til að setja hverja ríkisstjórn sem væri af.

Hann bætti því við að vilji hans stæði ekki til þess nú um stundir en Hamas-liðar yrðu að gera sér það ljóst að þeim væri nauðugur sá kostur að reyna að hefja friðarviðræður við ísraelsk stjórnvöld.

Ónafngreindur Hamas-liði sagði við fréttamann AP eftir að viðtalið var birt að Hamas-samtökin myndu ekki víkja með friðsömum hætti.