Hjarta fjarlægt úr stúlku

Breskum læknum hefur tekist að fjarlægja hjarta úr tólf ára gamalli stúlku sem grætt var í hana fyrir áratug síðan. Stúlkunni heilsast ótrúlega vel en hún kveðst samt finna fyrir tómleikatilfinningu annað slagið.

Þegar Hannah Clarke var einungis tveggja ára gömul kom í ljós að hún þjáðist af hjartagalla sem gerði að verkum að hjarta hennar nálega tvöfaldaðist að stærð. Á þessum tíma var fátt annað í stöðunni en að græða í hana nýtt hjarta, en í stað þess að fjarlægja gamla hjartað var það hvílt í brjóstholi Hönnuh. Fyrir nokkrum mánuðum kom í ljós að svo mjög hafði dregið úr virkni þeirra ónæmisbælandi lyfja sem Hanna tók að líkami hennar var að því kominn að hafna gjafahjartanu. Því var ákveðið að fjarlægja það úr henni og sjá hvort hennar eigið hjarta hefði jafnað sig svo vel að það gæti aftur tekið við hlutverki sínu. Dr. Magdi Yacoub, gamli læknirinn hennar sem sestur í helgan stein stýrði þessari áhættusömu aðgerð. Allt gekk að óskum og heilsast Hönnuh hreint ágætlega.

Þetta er fyrsta aðgerð sinnar tegundar í Bretlandi og að líkindum í heiminum. Hún tók innan við fjórar klukkustundir og var Hannah komin aftur heim til Wales fimm dögum síðar.

Margar af þeim aukaverkunum sem hrjáðu Hönnu áður eru nú nánast á bak og burt, til dæmis of hraður hjartsláttur. Nú tekur hann sig einungis upp þegar hún spilar tölvuleik við bróður sinn.