Friðargæsluliðar drepnir í Haítí

Tveir jórdanskir friðargæsluliðar voru skotnir til bana og sá þriðji særðist í Port-au-Prince, höfuðborg Haítí í gær. Ráðist var á þá á varðstöð í borginni en þar hefur verið róstursamt að undanförnu.

Friðargæsluliðar hafa verið í landinu frá árinu 2004 þegar forseta landsins, Jean Bertrand Aristide, var komið frá völdum en stuðningsmenn hans hafa látið ófriðlega í aðdraganda kosninga sem fram eiga að fara í næsta mánuði. Þeim hefur þegar verið frestað nokkrum sinnum en bráðabirgðastjórn hefur verið í landinu frá því að forsetinn flýði land. Hins vegar hafa yfirvöld og Sameinuðu þjóðirnar sagt að ekki komi til greina að fresta kosningunum enn einu sinni vegna árásarinnar.