Björgólfur Thor 32. auðugasti maður Bretlands

Breska blaðið Sunday Times metur eignir Björgólfs Thors Björgólfssonar á liðlega 214 milljarða króna og segir þær hafa fjórfaldast á einu ári. Hann er samkvæmt þessu þrítugasti og annar ríkasti maður Bretlandseyja.

Sunday Times birtir á hverju ári lista yfir þúsund auðugustu íbúa Bretlandseyja. Samanlagt ríkidæmi þeirra sem fylla listann að þessu sinni eru metin á hvorki meira né minna en fjörtíu og eitt þúsund milljarða króna og hafa þau aldrei verið meiri. Fjórðungur þeirra sem kemst á listann hefur erft auðæfi sín og einungis áttatíu og eina konu er þar að finna. Ríkustu menn Bretlands eru stáljöfurinn Lakshmi Mittal og Roman Abramovich, eigandi knattspyrnuliðsins Chelsea. Íslendingar mega hins vegar vel við una því Björgólfur Thor Björgólfsson er í 32. sæti listans. Auður hans er metinn á ríflega 214 milljarða króna en hann er sagður hafa fjórfaldast frá fyrra ári. Aðeins níu auðkýfingar á listanum hafa náð að ávaxta sitt pund betur en Björgólfur Thor. Bræðurnir Lýður og Ágúst Guðmundssynir, kenndir við Bakkavör, eru svo í hundraðasta og þriðja sæti listans, með 82 milljarða króna. Fleiri nöfn sem tengjast Íslandi er þarna að finna, til dæmis eru foreldrar Dorritar Moussaieffs í 465. sæti yfir ríkustu íbúa Bretlands en þau efnuðust á skartgripasölu. Athygli vekur hins vegar að nafn Jóns Ásgeirs Jóhannessonar er ekki að finna á listanum, en auður hans hefði að öllu jöfnu átt að tryggja honum sæti í þessum hópi. Ríkustu Bretarnir eru hins vegar ekki hálfdrættingar á við auðugasta mann heims, Robson Walton aðaleiganda WalMart-verslunarkeðjunnar bandarísku, en hann er talinn eiga 6.500 milljarða króna, ríflega sjöfalda landsframleiðslu Íslands.