Herirnir sagðir á heimleið

Innan árs verða allar breskar og bandarískar hersveitir kallaðar heim frá Írak að því er breska blaðið Sunday Telegraph hermir. Sveitirnar eru sagðar vera helsta ljónið á vegi til friðar í landinu.

Blaðið hefur þessar upplýsingar frá háttsettum embættismönnum úr breska landvarnaráðuneytinu en að því er hann segir eru þessar hugmyndir runnar undan rifjum Breta. Þær ganga í stuttu máli út á að næstu tólf mánuði verði smátt og smátt fækkað í 138.000 manna herliði Breta og Bandaríkjamanna í Írak en þess verður svo kallaður heim samtímis að loknu þessu tímabili. Telegraph segir helstu ástæðuna fyrir þessum bollaleggingum vera þá að æ fleiri séu að komast á þá skoðun að öryggisástandið í Írak sé svo slæmt beinlínis vegna erlenda herliðsins, ekki þrátt fyrir veru þess. Í staðinn munu íraskar hersveitir, en í þeim eru nú um 230.000 hermenn, taka við öryggisgæslu í landinu. Auk bandaríska og breska herliðsins eru um 15.000 hermenn frá 24 löndum í Írak og þeir munu sömuleiðis halda heim á næstu misserum, að því er Telegraph hermir.

Fullvíst má telja að aðstæður heima fyrir eigi stóran þátt í að bandarískir og breskir ráðamenn séu í þessum hugleiðingum því stríðsreksturinn er afar óvinsæll í báðum þessum ríkjum. Vinsældir þeirra George Bush Bandaríkjaforseta og Tony Blair forsætisráðherra Bretlands hafa dalað verulega; tæplega 2.400 bandarískir og breskir hermenn hafa látið lífið og hernámið hefur kostað skattgreiðendur þessara landa átján þúsund milljarða króna.