Heimsótti þá sem særðir eru

Hosni Mubarak, Egyptalandsforseti, heimsótti fjölmarga þeirra sem nú liggja sárir á sjúkrahúsi eftir hryðjuverkaárás á strandbæinn Dahab í gær. Tíu hafa verið handteknir vegna árásarinnar en tuttugu og fjórir féllu og sextíu særðust.

Flest bendir til að ekki hafi verið um sjálfsmorðsárásir að ræða, heldur hafi þrjár tímastilltar sprengjur sprungið á fjölförnum stað á mesta annatíma með örstuttu millibili.  24 féllu í árásinni, þar á meðal minnst þrír erlendir ferðamenn, og 60 særðust. Meðal þeirra sem liggja nú sárir eru um 40 Egyptar, þrír Danir, þrír Bretar, tveir Ítalir, tveir Þjóðverjar, tveir Frakkar, Suður-Kóreumaður, Palestínumaður, Svisslendingur, Bandaríkjamaður, Ísraeli og Ástrali.

Tíu voru handteknir vegna árásanna í dag, allt Egyptar. Ekki er vitað hvaða hlutverki þeir gegndu við skipulagningu árásanna, né hvort þeir tengjast stórum hryðjuverkasamtökum.

Hosni Mubarak, Egyptalandsforseti, og Ahmed Nazif, forsætisráðherra, heimsóttu í dag sjúkrahús í Sharm el-Sheik þar sem langlflestir þeirra sem særðust voru fluttir. Hann sagði árásina í gær hryðjuverk sem beinist gegn öllum Egyptum. Engin ástæða geti legið að baki önnur en að leggja efnahag landsins í rúst.

Tíundi hver Egypti vinnur við ferðamannaiðnað og alls færa ferðamenn um fimm hundruð milljarða íslenskra króna inn í hagkerfi landsins á hverju ári. Ætlunin var að ná níu milljón ferðamönnum til Egyptalands í ár, en árásirnar á Sharm el Sheik í fyrra og síðan Dahab í gær hafa heldur betur sett strik í reikninginn.

Fjölmargir þjóðarleiðtogar hafa fordæmt árásirnar í gær og þar á meðal er heimastjórn Palestínumanna. Ismail Haniey, forsætisráðherra, sagði árásina í gær hræðilega glæp og að Palestínumenn stæðu með Egyptum.