Tíu handteknir

Tíu hafa verið handteknir vegna hryðjuverkanna í Egyptalandi í gær. Tuttugu og fjórir féllu og sextíu særðust þegar vinsæll ferðamannastaður breyttist um stund í vígvöll. Íslensk hjón, sem eru í Sharm el Sheik, segja heimamenn algjörlega miður sín. Strandbærinn Dahab í Egyptalandi er ekki svipur hjá sjón eftir árásirnar í gær. Staðurinn, þar sem alla jafna eru glaðir ferðamenn að njóta hins ljúfa lífs, einkenndist í dag af ærandi þögn, eyðileggingu, depurð og blóðslettum. Flest bendir nú til að ekki hafi verið um sjálfsmorðsárásir að ræða, heldur hafi þrjár tímastilltar sprengjur sprungið á fjölförnum stað á mesta annatíma með örstuttu millibili

Tíundi hver Egypti vinnur við ferðamannaiðnað og alls færa ferðamenn um fimm hundruð milljarða íslenskra króna inn í hagkerfi landsins á hverju ári. Ætlunin var að ná níu milljón ferðamönnum til Egyptalands í ár, en árásirnar á Sharm el Sheik í fyrra og síðan Dahab í gær hafa heldur betur sett strik í reikninginn.

Tíu voru handteknir vegna árásanna í dag, allt Egyptar. Ekki er vitað hvaða hlutverki þeir gegndu við skipulagningu árásanna, né hvort þeir tengjast stórum hryðjuverkasamtökum. Bragi Jónsson og Erla Hendriksdóttir eru í Sharm el Sheikh, næsta bæ við Dahab, þar sem nærri sjötíu féllu í hryðjuverkaárás í fyrra. Bragi segir að þeim sé nú ráðlagt að halda sig innan dyra, auk þess sem ferðin verður stytt í annan endann og farið aftur heim um helgina. Bragi segir stafsmenn við ferðamannaiðnaðinn í Sharm el Sheikh harmi slegna. Þetta sé þungt högg fyrir ferðamannaiðnaðinn sem eigi eftir að hafa miklar afleiðingar.