Safna undirskriftum gegn mismunun Símans

Vestfirðingar standa nú fyrir undirskriftasöfnun á internetinu gegn því sem þeir kalla "misdýr gjaldsvæði í nafni einokunar". Þetta kemur fram á fréttavefnum bb.is. Nýlega var mesti gagnaflutningshraði ADSL-þjónustu Símans aukinn um helming á suðvesturhorninu og í grennd við Akureyri, án þess að verð væri hækkað. Nú greiða Vestfirðingar því sama verð fyrir 6Mb/s og flestir aðrir greiða fyrir 12Mb/s.

Þessu mótmæla Vestfirðingar og aðrir landsbyggðarbúar sem búa utan helstu þjónustusvæða Símans taka í sama streng. Á síðunni www.snerpa.is/siminn er undirskriftalistann að finna, auk þess sem landsbyggðarbúar geta lagt orð í belg. Þar er meðal annars bent á að áskrifendur utan helstu þjónustusvæða geti ekki fengið aðgang að þeim tugum sjónvarpsrása sem Síminn auglýsi að áskrifendur ADSL-þjónustu sinnar geti stytt sér stundir með.