Einn hefur verið handtekinn

Ævintýralegt rán var framið á Englandi í fyrrinótt þar sem stolið var jafnvirði fimm milljarða íslenskra króna í beinhörðum peningum. Lögregla leitar ræningjanna ákaft og hefur einn verið handtekinn.

Það var í fyrrakvöld sem ræningjarnir, dulbúnir sem lögregluþjónar, stöðvuðu yfirmann fjárgeymslu Securitas í Kent, skammt utan við Lundúnir, þar sem Englandsbanki geymir seðla sína . Þeir sögðu honum að búið væri að ræna eiginkonu hans og syni og ef hann færi ekki með þeim í geymsluna yrði fjölskyldu hans gert mein. Þegar í geymsluna var komið bundu þeir og kefluðu öryggisverðina og næstu klukkustundina dunduðu þeir sér svo við að stafla 43 milljónum sterlingspunda, eða rúmum fimm milljörðum íslenskra króna, í flutningabíl. Að því búnu slepptu ræningjarnir öllum gíslum sínum ómeiddum, þar á meðal fjölskyldu yfirmannsins, og óku svo á brott út í náttmyrkrið.

Í dag bauð lögregla þeim sem veitt gæti upplýsingar sem leiða myndu til handtöku ræningjanna rúmar tvö hundruð milljónir og nú undir kvöld greindi Sky-fréttastofan frá því að einn hefði verið handtekinn. Þetta er langstærsta ránið í sögu Bretlands.