Ahmadinejad verði saksóttur fyrir ummælin um Helförina

Ísraelskur lögfræðingur hefur beðið þýsk stjórnvöld um að sækja Mahmoud Ahmadinejad, forseta Írans, til saka fyrir að segja að Helförin sé sögusögn. Forsetinn lét þessi ummæli falla í desember síðastliðnum en hann hefur einnig sagt að réttast væri að eyða Ísrael af yfirborði jarðar. Í Þýskalandi eru lög sem banna að fólk neiti því að Helförin hafi átt sér stað og eru viðurlög við brot á lögunum allt að fimm ára fangelsi. Ekki er víst að lögin nái yfir ummæli Ahmadinejad þar sem hann er hvorki þýskur né var staddur í landinu þegar hann lýsti þessu yfir.