Skemmtiferð lauk með skelfingu

Skemmtiferð um Persaflóann lauk hræðilega í gærkvöldi, þegar stór snekkja, yfirfull af fólki, fór á hliðina með þeim afleiðingum að 57 manns drukknuðu. Flestir í bátnum voru útlendingar í verktakavinnu í Bahrain.

Tæplega 140 manns voru á skemmtisiglingu fyrir utan Bahrain, margir þeirra útlendingar, að fagna byggingu nýjasta skýjakljúfsins í furstadæminu. Allt of margir voru í bátnum, sem fór á hvolf skammt frá landi. Stilla var og engar líkur eru taldar á að um hryðjuverk hafi verið að ræða.

Flestir þeirra sem drukknuðu voru í veitingasal skipsins en þeir sem komust lífs af voru uppi á dekki. Af þeim sem létust voru 17 Indverjar, 13 Bretar, og fólk frá Pakistan, Suður-Afríku, Filippseyjum, Singapore, Þýskalandi og Írlandi. Enn er á annan tug manna saknað.