ESB bjargar Palestínumönnum frá gjaldþroti

Evrópusambandið ætlar að bjarga Palestínumönnum frá gjaldþroti. Framkvæmdastjórn sambandsins samþykkti í morgun að styrkja heimastjórnina um tæpa tíu milljarða króna.

Fjármál palestínsku heimastjórnarinnar eru í rúst. Sigur Hamas-samtakanna í kosningum í janúar gerði svo vont ástand enn verra. Ríkisstjórn Ísraels ákvað að hætta skattaendurgreiðslum til Palestínu sem hafa numið um fimmtíu milljónum dollara á mánuði eða röskum þrjú hundruð milljónum króna. Strax núna um mánaðarmótin þarf heimastjórnin að borga rösklega fjögurra milljarða króna skuld og alls nemur fjárlagahallinn um sex miljörðum króna bara í febrúar.

Styrkurinn sem framkvæmdastjórn ESB samþykkti í morgun ætti að hrökkva fyrir helstu nauðsynjum í um tvo mánuði. Helmingur upphæðarinnar rennur til fátækustu hluta Palestínu í gegnum hjálparstofnanir Sameinuðu þjóðanna. Þriðjungur fer beint í rafmagnsreikninga og afgangurinn ætti að duga fyrir launum embættismanna í tvo mánuði.

Enn liggur þó ekki fyrir hvort Evrópusambandið haldi áfram að styrkja heimastjórnina eftir að Hamas samtökin taka við stjórnartaumunum. Leiðtogar Hamas segjast vonast til að sambandið virði vilja palestínsku þjóðarinnar og haldi áfram að styrkja þá stjórn sem fólkið í Palestínu hafi valið.