Fimm uppreisnarmenn drepnir í Sádi-Arabíu

Fimm uppreisnarmenn týndu lífi eftir tveggja klukkustunda samfellda skotbardaga við lögreglu í Sádi-Arabíu í nótt.

Lögreglumenn umkringdu vígi uppreisnarmannanna þegar rökkva tók í gær. Mennirnir eru grunaðir um að hafa ætlað að sprengja stærsta olíuhreinsunarfyrirtæki heims á föstudaginn og lögregla hefur verið á hælunum á þeim síðan. Árásin sem misheppnaðist hefði getað haft geigvænlegar afleiðingar enda fara tveir þriðju hlutar allrar olíu í Sádi-Arabíu í gegnum olíuhreinsunarstöðina, sem ætlunin var að sprengja.

Fjölmennu liði lögreglu tókst ekki að komast inn í hýbíli mannanna í nótt og umsátursástand skapaðist. Fljótlega tók byssugelt að óma og í tvær klukkustundir geysuðu skotbardagar á milli lögreglu og mannanna inni í húsinu. Þeim lauk svo eldsnemma í morgun ogþá höfðu fimm uppreisnarmenn týnt lífi. Við nánari leit í húsinu fannst mikið af skotvopnum, sem og skotfærum, en ekki liggur fyrir hvort mennirnir hafi haft uppi áform um frekari hryðjuverk.