Útgöngubanni aflétt í Bagdad

Útgöngubanni var í morgun aflétt í Bagdad, höfuðborg Íraks, eftir hrinu árása í kjölfar sprengingar við al-Askari moskuna, einn heilagasta stað sjía, í síðustu viku.

Höfuðborgin iðaði ekki beinlínis af lífi í morgun en engu að síður virtust flestir tilbúnir til að hefja dagleg störf á ný eftir sannkallað upplausnarástand síðustu fimm dagana. Nærri tvö hundruð manns hafa látið lífið í fjölmörgum sprengjuárásum síðan á miðvikudaginn, síðast sextán manns í suðvesturhluta Baghdad í gær. Útgöngubannið virðist hafa haft tilætluð áhrif og gefið lögreglu- og hermönnum svigrúm til að lægja öldurnar í höfuðborginni. Engu að síður óttast margir að átökum sjía og súnnía sé hvergi nærri lokið og rólegheitin í morgun séu aðeins lognið á undan storminum.