Íslamskir öfgamenn farið um Balkanskagann í 15 ár

Íslamskir öfgamenn, með tengsl við Al-Qaeda hryðjuverkasamtökin, hafa ferðast fram og aftur yfir Balkanskagann í meira en fimmtán ár. Þessu er haldið fram í nýrri skýrslu um grunaða íslamska hryðjuverkamenn í Bosníu.

Leyniþjónustur Bandaríkjanna og Króatíu unnu skýrsluna sem er á þriðja hundrað blaðsíður. AP-fréttastofan hefur komist yfir eintak af henni. Samkvæmt skýrslunni hafa múslimarnir nýtt sér lélega landamæra- og öryggisgæslu á Balkanskaganum og komist þannig án mikilla vandkvæða til Evrópu, en þeir eru aðallega taldir hafa komið frá Afganistan og þá í gegnum Tyrkland, Kosovo og Albaníu. Talsmaður múslima í Bosníu segir það sem fram komi í skýrslunni ekki eiga við rök að styðjast.

Mirsad Bektasevic er annar tveggja herskárra múslima sem bosnískur dómstóll ákærði í síðustu viku fyrir að leggja á ráðin um að sprengja í loft upp ótilgreint skotmark í Evrópu. Bektasevic, sem er 19 ára og búsettur í Svíþjóð, mun hafa átt fundi með samverkamönnum sínum á hóteli í útjaðri Serajevo. Þeir eru meðal annars sagðir koma frá Bretlandi og Danmörku. Lögreglan í Bosníu hafði Bektasevic undir eftirliti og gerði áhlaup á íbúð hans í Serbíu síðasta haust. Þar var lagt hald á sprengiefni og ýmislegt annað.

Lögregla í Bosníu hefur eftirlit með íslömskum vígamönnum sem komu þangað til lands til að berjast með múslimum á árunum 1992 til 1995. Flestir munu síðan hafa farið til að berjast í Afganistan, Téténíu og Írak. Einhverjir urðu þó eftir. Talið er að flestir þeirra sem nú berjist séu ungir karlmenn sem hafi bugast vegna 40% atvinnuleysis í landinu.

Klerkar segja erftitt að hafa auga með þeim sem boði heilagt stríð gegn vesturlöndum. Auk þess séu nú aðeins um sex þúsund og fimm hundruð friðargæsluliðar Evrópusambandsins í Bosníu eða um einn tíundi herliðs Atlandshafsbandalagsins sem var þar árið 1995.