Al-Qaida á ferð um Balkanskaga

Íslamskir öfgamenn, með tengsl við Al-Qaida, hafa ferðast fram og aftur yfir Balkanskagann í meira en fimmtán ár. Þessu er haldið fram í nýrri skýrslu um grunaða íslamska hryðjuverkamenn í Bosníu. Leyniþjónustur Bandaríkjanna og Króatíu gerðu skýrsluna en AP-fréttastofan hefur komist yfir eintak af henni. Samkvæmt skýrslunni hafa múslimarnir nýtt sér lélega landamæra- og öryggisgæslu á Balkanskaganum og komist þannig án mikilla vandkvæða til Evrópu, en þeir eru aðallega taldir hafa komið frá Afganistan og þá í gegnum Tyrkland, Kosovo og Albaníu. Talsmaður múslima í Bosníu segir það sem fram komi í skýrslunni ekki eiga við rök að styðjast.