90.000 manns hafa flúið heimili sín

Þorri þeirra sem hafa þurft að flýja heimili sín eru Sjíar sem búa á svæðum þar sem súnníar eru í meirihluta. rauði hálfmáninn hefur komið upp tjaldbúðum þar sem hluti þessa fólks getur hafst við á meðan ástandið er jafneldfimt og raun ber vitni. Eftir árásina á al-Askari moskuna í febrúar blossuðu upp átök á milli þessara hópa, svo legið hefur við borgarastyrjöld. Þúsundir manna hafa fengið nafnlausar líflátshótanir trekk í trekk og margir treysta sér hreinlega ekki til annars en að flýja heimili sín. Talsmaður trúarstofnana Sjía, telur að alls hafi um níutíu þúsund manns yfirgefið heimili sín í landinu undanfarið. Þar af tuttugu og fimm þúsund eftir árásina á al-Askari.

Bandaríski herinn sendi í morgun frá sér tilkynningu þar sem segir að meira en tuttugu hryðjuverkamenn hafi verið drepnir í Írak undanfarnar vikur og margir þeirra hafi verið klæddir sprengjubelti þegar þeir hafi verið drepnir. Þá hafi meira en fimmtíu manns verið handsamaðir í áhlaupi a vígi hryðjuverkamanna í gær.