Flóðin í Dóná virðast í rénun

Flóðin í Dóná virðast í rénun en þau hafa valdið miklum skemmdum á heimilum og ræktarlandi í Búlgaríu, Rúmeníu og Serbíu. Þar hefur áin flætt yfir bakka sína síðustu viku og er yfirborð Dónár enn hátt, en um helgina mældist yfirborð hennar það hæsta í hundrað og ellefu ár. íbúar á svæðinu reyna nú að hjálpa hermönnum við að koma í veg fyrir frekari flóð. Búið er að hlaða sandpokum meðfram götum og vatnsdælur eru enn notaðar til að þurrka upp flóðasvæði. Mikið hefur rignt á svæðinu og snjór bráðnað í fjöllum. Sökum þess hefur mikið flætt í Suð-austur Evrópu síðustu vikur.