Frekara klúður vegna Katrínar kemur í ljós

Klúður embættismanna eftir að fellibylurinn Katrín skall á Bandaríkjunum er alltaf að koma betur og betur í ljós. Nú hefur AP-fréttastofan komist yfir myndband, þar sem ríkisstjóri Louisiana fullvissar fulltrúa stjórnvalda um að flóðvarnir New Orleans hafi ekki brostið, nokkrum klukkustundum eftir að fellibylurinn reið yfir.

Hið rétta var að flóðvarnirnar höfðu brostið og vegna þess hefði strax þurft að setja allt púður í að auka hjálparstarf á svæðinu. Í gær komu fram upplýsingar um að Bush forseti hefði vitað um hugsanlegar afleiðingar Katrínar og hefði fullvissað alla um að stjórnvöld væru tilbúin til að veita alla þá aðstoð sem þyrfti til.